Mangicuah Bulek

Bak saari, tadanga kaba tantang alam Tapaktuan nan Rancak. Ditambah lai tapak kaki Tuanku Tapa. Kaba tu sampai ka talingo bulek-bulek dari Balando, Micheal, Fordies, dan Lolita. Urang tu baru jo pulang dari Sabang bara ari doklu. Kinin, urang tu nandak babaliak ka kampuang e di Balando. Tapi, urang tu nandak bamalam samalam lai di Banda Aceh. Alahtu baru urang tu barangkek ka Balando.

Sampai di Banda, malam tu juo urang tu mamasan tiket pasawat. Wakatu pagi tibo, niat untuak babaliak ka kampuang nakdo jadi pulo. Fordies mangecek ka kawan-kawan e, “Ado sabuah tampek legendaris di Aceh ko yang harus awak pai. Tampek e di Tapaktuan, Kabupaten Aceh Selatan. Tampek ko harus awak kunjuang, kok indak, Rugi bana awak. Sabab awak alah sampai ka Aceh.”

“Ha iyolah kalo lago tu,” sahuik kawan e.

Bulek-bulek tu akhianyo pai ka tampek yang alah mambuek urang tu panasaran. Inyo pai jo moto L-300. “Bang, ka Tapaktuan yo!!!” kecek Lolita, bulek padusi yang ancak babana.

Mandanga kato “Tapaktuan”, mamak supir tu pun langsuang bacaito panjang tantang kaindahan jo kaelokan Tapaktuan. Inyo bacaito bangga, karna inyo urang Tapaktuan. Mandanga caito dari mamak supir moto tu, bulek-bulek dari Balando lah indak saba lai. Lah hawa bana inyo nandak mancaliak baa bantuak tapak kaki Tuan Tapa tu.

Urang tu akianyo tibo di Tapaktauan. Karna alah elok na lapa, singgahlah e di sabuah warong nasi tapi jalan. Siap makan, Lolita lansuang batanyo dakek makwa punyo warong. “Apo ado urang yang bisa mambaok kami ka tampek tapak Tuan Tapa?”

“Si Samin, kamanakan ambo yang kelas duo SMA tu biaso mamandu urang ka tampek tapak Tuan Tapa. Cubo kalian ajak jo. Samin pandai juo baso Inggris,” kecek makwa yang punyo warung tu.

Diimbau e pulo si Samin. Akianyo Samin jo bulek Balando tu lansuang ka tampek yang nandak dituju, ka bukik gunuang Lampu. Samulo, Samin mambaok bulek-bulek tu ka TK. Bulek-bulek tu pun nakdo batanyo manga dibaok ka situ. Inyo pikia mungkin tapak Tuan Tapa tu ado di TK. Masuaklah bulek jo Samin ka TK tu. Sampai e di dalam, nampak sabuah tapak kaki urang. Tapi ukuran e ketek. Samin manjalehan samo bulek tu tantang tapak kaki yang ado di dapan tu. “Ko lah e, Mister, tapak kaki Tuan Tapa yang legendaris tu. Sabano e ado duo tapak kaki Tuan Tapa tu,” kecek Samin.

“Tapi ambo baco di sabuah buku, tapak kaki Tuan Tapa tu cuma sabuah, yang ukuran e gadang. Manga pulo kini lah ado duo?” tanyo Micheal.

“O… itu informasi salah mungkin. Yang iyo tu, tapak kaki Tuan Tapa ado duo, yang sabalah kanan jo yang sabalah keda. Yang sabalah kanan ukuran e gadang bana. Tapak kaki yang sabalah keda ukuran e ketek. Tapak kaki yang sabalah kanan, alah dibaok dakek nago, tinggalah yang sabalah keda di siko,” kecek Samin serius.

Bulek-bulek tu mangangguak-angguak. “Waang iyo lua biaso. Urang-urang lagu waanglah yang harus dipasalamat dan diagiah penghargaan, sabab alah manjago sajarah,” kecek bulek yang tenggi bana-bana, Micheal.

“Pasti, Mister. Di daerah ko, cuma ambo yang tau banyak tantang legenda tu. Yang lain, cuma tau legenda tu lewat buku-buku yang alah ditulih urang,” jawab Samin sombong.

“Hebat bana waang, Min,” kecek Fordies. Inyo lansuang mengalua-an kepiang duo Ratuih Ribu. Kepiang tu diagiah e kek Samin. Michael jo Lolita lago tu juo. Samin tagalak dalam hati. Lah dapek keping anam Ratuih Ribu dari bulek-bulek bengak tu. Samin naakdo lai mairau bulek-bulek tu. Urang tu alah kalamakan bafoto-foto di tapak kicuah-kicuah tu.

Nakdo lamo alah tu, masuaklah Pakcik Uman ka TK. Dilieklah bulek-bulek tu tangah kalamak bana bafoto-foto. “Hai.. Mister, apo buek ko?” tanyo pakcik Uman.

“Ko ha, tangah bafoto-foto jo tapak kaki Tuan Tapa,” sahuik bulek tu.

“Apo??? Bukan tu doh tapak kaki Tuan Tapa. Sia mangecekan tu tapak kaki e? Iyo alah kanai kicuah Mister ko. Tapak kaki Tuan Tapa tu bukan di siko tampek e, tapi di gunung lampu. Ko tapak kaki yang dibuek manusio, untuk anak-anak TK. Sia yang alah mangicuah Mister?” kecek Pakcik Uman.

Mandanga itu, manyalaplah bulek-bulek Balando tu. “Pantek wek Samin tu. Awak dikicuah e, iyo paja cilako!!!” Michael manyumpah.

“Hoii, kasiko waang, Samin! Bawok siko baliak keping ambo tu. Ambo nakdo suko dakek uRang pangicuah. Kok nakdo waang pulang kepiang kami, ambo tapuak waang!” kecek bulek-bulek tu beRang.

“Waang iyo, Min. Urang lua pai ka kampuang awak waang kicuah-kicuah. Nakdo jadi lagu tu. Isuak nakdo mau lai urang-urang lua pai ka tampek awak. Waang ko iyo. Baliak-an kepiang bulek tu!” kecek Pakcik Uman pulo.

Akianyo, kepiang yang diambiak dakek Samin cako dipulangkan e baliak kek bulek tu. Basanggaklah Samin. Manyasa bana inyo alah mangicuah bulek tu, padahal kalo indak dikicuah e, alah dapek kepiang banyak inyo. Bulek-bulek tu pun lansuang pai ka gunuang Lampu dipandu Pakcik Uman maliek tapak kaki yang asli.

Azmi Labohaji